பிரான்ஸ்: வரி துறை, கல்வி அமைச்சகம் தரவு திருட்டு தொடர்கதை

ஜீரோபைட்ஸ் (ZeroBytes) என்ற ஹேக்கர் குழு, பிரான்ஸ் வரி நிர்வாகத்தின் தரவுகளை திருடிய சம்பவத்திற்குப் பொறுப்பேற்றுக் கொண்டதாக ஃப்ரான்ஸ்இன்ஃபோ (franceinfo) செய்தி நிறுவனம் தெரிவித்துள்ளது. இதே குழுவே, ஜூலை மாத இறுதியில் தேசியக் கல்வி அமைச்சகத்தின் தகவல் தொழில்நுட்ப அமைப்பொன்றில் ஊடுருவல் நடத்தியதாகவும் கூறியுள்ளது. ஜூலை 31ஆம் தேதி கல்வி அமைச்சகம், தங்களது ஒரு தகவல் அமைப்பில் மோசடியான ஊடுருவல் ஏற்பட்டதாக அறிவித்திருந்தது.

இதற்கிடையே, மியூச்சுவல் ஜெனரல் டி ப்ரெவோயான்ஸ் (Mutuelle générale de prévoyance) எனும் மருத்துவக் காப்பீட்டு நிறுவனத்தின் உறுப்பினர்களுக்குச் சொந்தமான தனிப்பட்ட தகவல்களும், வங்கிக் கணக்கு விவரங்களான ஐபான் (Iban) எண்களும் சைபர் தாக்குதலின்போது திருடப்பட்டுள்ளன. இது தொடர்பாக விசாரணை தொடங்கப்பட்டுள்ளது. எனினும், உறுப்பினர்களின் உடல்நலம் தொடர்பான தரவுகள் அல்லது சிகிச்சை, திருப்பிச் செலுத்துதல், காப்பீட்டு உத்தரவாதங்கள் தொடர்பான எந்த தகவலும் இதில் பாதிக்கப்படவில்லை என்று நிறுவனம் உறுதியளித்துள்ளது.

மறுபுறம், பொது நிதி பொது இயக்குநரகம் (DGFiP) செவ்வாய்க்கிழமை, வாரிசு இல்லாமல் விடப்பட்ட சொத்துகள் தொடர்பான தரவுகளில் மூன்றாவது கசிவு ஏற்பட்டதாக அறிவித்துள்ளது. இருப்பினும் இது, சமீபத்தில் வரி துறையை பாதித்த பெரிய அளவிலான ஹேக்கிங் சம்பவத்தைப் போன்ற பரிமாணம் கொண்டதல்ல என்று திணைக்களம் தெளிவுபடுத்தியுள்ளது. இந்த மூன்றாவது கசிவு விரைவில் கண்டறியப்பட்டு உடனடியாக முடக்கப்பட்டதாகவும் தெரிவிக்கப்பட்டுள்ளது.

லெ மோண்ட் (Le Monde) நாளிதழின்படி, பொது நடவடிக்கை மற்றும் கணக்குகள் அமைச்சர் டேவிட் அமியேல் (David Amiel), பொது நிதி பொது இயக்குநரகம் மற்றும் தேசிய தகவல் அமைப்பு பாதுகாப்பு முகமை (Anssi) ஆகியவை இணைந்து, மில்லியன் கணக்கான மக்களைப் பாதித்த இந்த தரவு திருட்டு தொடர்பாக விரிவான விளக்கமளித்துள்ளன. நில அளவை (கடாஸ்ட்ரல்) தொடர்பான தரவுகளும், வாரிசு தொடர்பான தகவல்களும் இதில் அடங்கும் என்று அதிகாரிகள் உறுதிப்படுத்தியுள்ளனர்.