பிரான்ஸில் கடும் வெப்பம்: 20 மாவட்டங்களில் எச்சரிக்கை, காய்கறி விளைச்சல் சரிவு

பிரான்ஸ் நாட்டின் தென்கிழக்கு பகுதியில் அமைந்துள்ள 20 மாவட்டங்களில் ஆரஞ்சு நிற வெப்ப அலை எச்சரிக்கை (vigilance orange canicule) தொடர்ந்து அமலில் உள்ளது. இதற்கிடையே, ஓட் லுவார் (Haute-Loire) மற்றும் பியி-தெ-தோம் (Puy-de-Dôme) ஆகிய இரண்டு மாவட்டங்கள் ஆரஞ்சு நிலையிலிருந்து மஞ்சள் நிற எச்சரிக்கை நிலைக்கு மாற்றப்பட்டுள்ளன, இது சூழல் ஓரளவு மேம்பட்டிருப்பதைக் காட்டுகிறது.

இதேவேளை, நாடு முழுவதும் தொடர்ச்சியாக ஏற்பட்டு வரும் வறட்சியும் கடும் வெப்ப அலைகளும் காய்கறி விவசாயத்தை பெரிதும் பாதித்துள்ளன. மலர்க்கோஸ், பட்டாணி, சாலட் இலைகள் போன்ற பயிர்கள் தண்ணீர் பற்றாக்குறையால் கடுமையாக பாதிக்கப்பட்டுள்ளதாக லெ மொந்த் (Le Monde) செய்தித்தாள் தெரிவித்துள்ளது. நீர்ப்பாசனம் செய்யப்பட்ட இளம் நாற்றுகள் கூட உயிர்வாழத் தவறியுள்ளதாக விவசாயிகள் தெரிவிக்கின்றனர்.

காய்கறி உற்பத்தித் துறையினர் இந்த நிலைமையை “பேரழிவு” என வர்ணித்துள்ளனர். குறிப்பாக பிரான்ஸின் மேற்குக் கடலோரப் பகுதி முழுவதும் இந்த பாதிப்பு தீவிரமாக உள்ளது. தற்போதைய பயிர் இழப்புடன் மட்டுமல்லாமல், அடுத்த பருவங்களுக்கான விதைப்பு திட்டங்களும் பாதிக்கப்பட்டுள்ளதாக தெரிவிக்கப்படுகிறது. இதனால் எதிர்காலத்தில் காய்கறி விநியோகத்திலும் தட்டுப்பாடு ஏற்படலாம் என்ற அச்சம் நிலவுகிறது.

தொடர்ச்சியான வெப்ப அலைகள் காரணமாக பிரான்ஸ் அதிகாரிகள் பொதுமக்களுக்கு எச்சரிக்கை விடுத்துள்ளனர். வெப்ப அலை பாதிப்பு அதிகமுள்ள மாவட்டங்களில் வசிப்பவர்கள், முதியோர் மற்றும் குழந்தைகள் போன்ற பாதிக்கப்படக்கூடிய குழுவினர் தேவையற்ற வெளியில் செல்வதைத் தவிர்க்குமாறும், போதிய அளவு நீர் அருந்துமாறும் அறிவுறுத்தப்பட்டுள்ளனர். இந்நிலை தொடர்ந்தால் விவசாயத் துறை மற்றும் உணவு விநியோகச் சங்கிலியில் மேலும் பாதிப்புகள் ஏற்படக்கூடும் என நிபுணர்கள் எச்சரிக்கை விடுத்துள்ளனர்.