லெ ஸ்கூவார்நெக் வழக்கில் 48 புதிய பாதிக்கப்பட்டோர் மீது புலனாய்வு

பிரான்ஸ் நாட்டில் மிகப்பெரிய பாலியல் வன்கொடுமை வழக்குகளில் ஒன்றான ஜோயல் லெ ஸ்கூவார்நெக் (Joël Le Scouarnec) வழக்கில் புதிய திருப்பம் ஏற்பட்டுள்ளது. 74 வயதான இந்த முன்னாள் அறுவை சிகிச்சை நிபுணர் மீது, முன்பு தண்டனை பெற்ற வழக்கில் இடம்பெறாத 10 வன்புணர்வு மற்றும் 40 பாலியல் தாக்குதல் குற்றச்சாட்டுகள் தொடர்பாக அதிகாரப்பூர்வ நீதிமன்ற விசாரணை (information judiciaire) தொடங்கப்பட்டுள்ளதாக பிரெஞ்சு ஊடகங்கள் தெரிவித்துள்ளன. இந்த புதிய புகார்கள், அவரது பிரதான வழக்கு விசாரணை முடிவடைந்த பின்னர் புதிதாக முன்வந்த 48 பாதிக்கப்பட்டோரிடமிருந்து பெறப்பட்டவை என்றும், இவை கடந்த முப்பது ஆண்டுகளில் நடந்திருக்கக்கூடும் என்றும் தெரிவிக்கப்பட்டுள்ளது. கடந்த மே மாதம், லெ ஸ்கூவார்நெக் மீது 299 பேர் மீதான வன்புணர்வு மற்றும் பாலியல் தாக்குதல் குற்றங்களுக்காக, சட்டத்தில் வழங்கக்கூடிய அதிகபட்ச தண்டனையான 20 ஆண்டுகள் சிறைத்தண்டனை விதிக்கப்பட்டது. இத்தண்டனைக்கு எதிராக அவர் மேல்முறையீடு செய்யவில்லை என்பது குறிப்பிடத்தக்கது. தண்டனையில் மூன்றில் இரண்டு பங்கு காலம் நிபந்தனையற்ற பாதுகாப்புக் காலமாக (période de sûreté) நிர்ணயிக்கப்பட்டாலும், சிறைத்தண்டனைக்குப் பின் மருத்துவ-நீதித்துறை மையத்தில் தடுத்து வைக்கும் ‘பாதுகாப்புக் காவல்’ (rétention de sûreté) நடவடிக்கை நிராகரிக்கப்பட்டது. இந்த வழக்கு, பிரான்ஸ் நாட்டில் பாலியல் வன்கொடுமையாளர்கள் தங்கள் குற்றங்களை ஆவணப்படுத்தும் போக்கையும் மீண்டும் விவாதப் பொருளாக்கியுள்ளது. டொமினிக் பெலிகோ (Dominique Pelicot) வழக்கு போலவே, லெ ஸ்கூவார்நெக்கும் தனது செயல்களை நாட்குறிப்புகள் மூலம் விரிவாக பதிவு செய்திருந்தார் என்றும், இது ஒருவகை ஆசாபிமானத் தன்மையை (fétichisme) ஒத்திருப்பதாக நிபுணர்கள் கருத்து தெரிவித்துள்ளனர். இத்தகைய ஆவணங்கள்தான் விசாரணை அதிகாரிகளுக்கு பல குற்றங்களை உறுதிசெய்ய உதவியதாகவும் தெரிவிக்கப்படுகிறது.