அசாமில் மரப்படகில் 2,000 பேரைக் காப்பாற்றிய இளைஞன்

இந்தியாவின் வடகிழக்கு மாநிலமான அசாமில் தொடர் மழையால் ஏற்பட்ட வெள்ளத்தில் பல கிராமங்கள் நீரில் மூழ்கியிருந்த நிலையில், அங்கு சிக்கியிருந்த மக்களை மீட்பதில் அரசு படைகளுக்கு நிகராக ஒரு சாதாரண இளைஞர் முக்கியப் பங்காற்றியுள்ளார். மீட்புப் பணிக்கான எந்தவிதப் பயிற்சியும் பெறாத அந்த இளைஞர், விசை மூலம் இயக்கப்படும் நவீன படகும் இல்லாமல், தனது சொந்த மரப்படகைக் கொண்டே பாதிக்கப்பட்டவர்களை ஒவ்வொருவராக வெள்ள நீரில் இருந்து வெளியேற்றியுள்ளார்.

தொடர்ந்து பல முறை மரப்படகில் பயணித்து, சுமார் 2,000 பேரை பாதுகாப்பான பகுதிகளுக்கு அவர் கொண்டு சென்றுள்ளதாகத் தெரிவிக்கப்படுகிறது. உணவு, குடிநீர் இல்லாமல் மேல்தள வீடுகளிலும் உயரமான இடங்களிலும் தங்கியிருந்த முதியோர், பெண்கள், குழந்தைகள் உள்ளிட்டோரை இவ்வாறு மீட்டிருப்பது குறிப்பிடத்தக்கது.

அரசு நிவாரணக் குழுக்கள் மற்றும் படைப் பிரிவினர் சம்பவ இடத்திற்கு சென்றடைவதற்கு முன்பே, உள்ளூர் மக்களே சுயமாக இணைந்து மீட்புப் பணிகளில் ஈடுபட்டதாகவும் தெரிவிக்கப்படுகிறது. இந்த இளைஞனின் துணிச்சலான செயல் தற்போது சமூக வலைதளங்களில் பரவலாகப் பேசப்படுகிறது. உயிருக்கு அஞ்சாமல் தொடர்ந்து பல முறை படகை இயக்கி, சிக்கியிருந்தோரை ஒவ்வொருவராக மீட்டதன் மூலம், அவர் பலரின் பாராட்டையும் பெற்றுள்ளார்.

அசாம் மாநிலத்தில் ஆண்டுதோறும் பருவமழைக் காலத்தில் பிரம்மபுத்ரா நதி வெள்ளத்தால் நிலம் நீரில் மூழ்குவது வழக்கமான நிகழ்வாக உள்ளது. இதனால் ஆயிரக்கணக்கான மக்கள் இடம்பெயர்ந்து நிவாரண முகாம்களில் தங்க வேண்டிய கட்டாயம் ஏற்படுகிறது. இந்நிலையில், அரசு உதவி வருவதற்கு முன்பே உள்ளூர் இளைஞர்களின் இத்தகைய முன்முயற்சிகள் பல உயிர்களைக் காப்பாற்றுவதில் முக்கியப் பங்காற்றி வருகின்றன.