2027 பிரெஞ்சு அதிபர் தேர்தல்: லெகோர்னு வேட்பாளராகலாம் என எலிசே அரண்மனை சூழ்ச்சி

பிரான்ஸ் நாட்டில் 2027ஆம் ஆண்டு நடைபெறவுள்ள அதிபர் தேர்தலுக்கு முன்னதாக, அதிபர் இமானுவேல் மக்ரோன் அரசியல் அரங்கில் தொடர்ந்து முக்கிய பங்கு வகிக்க விரும்புவதாக பிரெஞ்சு ஊடகமான லெ மோந்த் (Le Monde) தெரிவித்துள்ளது. பதவிக்காலம் முடிவடையும் தறுவாயில் இருந்தும், அதிபர் அரசியல் களத்தில் இருந்து விலகிக்கொள்ளும் எண்ணம் இல்லை என்பது தெளிவாகிறது.

மத்திய அணியில் இருந்து ஏற்கெனவே முன்னாள் பிரதமர் எடுவார் பிலிப் மற்றும் தற்போதைய கட்சித் தலைவர் கேப்ரியல் அட்டால் ஆகிய இருவரும் தமது வேட்புமனுவை அறிவித்துள்ளனர். எனினும், இவ்விருவரும் அதிபர் மக்ரோனுக்கு போதுமான அளவு உகந்தவர்களாக தெரியவில்லை என தகவல்கள் கூறுகின்றன.

இந்நிலையில், அதிபருக்கு நெருக்கமான வட்டாரத்தினர், தற்போதைய பிரதமர் செபாஸ்டியன் லெகோர்னுவை மத்திய அணியின் வேட்பாளராக முன்வைக்கும் யோசனையை முன்னெடுத்து வருவதாக தெரிவிக்கப்படுகிறது. இது எலிசே அரண்மனையின் உள்முகச் செயல்பாடுகளில் புதிய திருப்பமாக கருதப்படுகிறது.

இந்த நகர்வு, மக்ரோனின் அரசியல் வாரிசு யார் என்ற கேள்விக்கு பதிலளிக்கும் முயற்சியாகவும், அதே சமயம் மத்திய அணியில் ஏற்கனவே போட்டியிடும் பிலிப் மற்றும் அட்டால் இடையேயான பிளவை இன்னும் ஆழப்படுத்தக்கூடிய நகர்வாகவும் பார்க்கப்படுகிறது. அதிபர் மக்ரோனின் இந்த உத்தி, பிரெஞ்சு அரசியலில் தற்போது பரவலாக விவாதப் பொருளாக மாறியுள்ளது.

இது தொடர்பாக அதிகாரப்பூர்வ அறிவிப்பு எதுவும் இதுவரை வெளியாகவில்லை என்பது குறிப்பிடத்தக்கது.