ஐரோப்பாவில் காலநிலை மாற்றத்தால் தீ பரவல் ஆபத்து அதிகரிப்பு

ஐரோப்பிய நாடுகளில் இந்த கோடைக்காலத்தில் வெப்பமும் வறட்சியும் காரணமாக பரவலான காட்டுத் தீ சம்பவங்கள் பதிவாகியுள்ளன. பெல்ஜியம், ஸ்பெயின், பிரான்ஸ், கிரீஸ் ஆகிய நாடுகளில் இந்த தீ விபத்துகள் பாதிப்பை ஏற்படுத்தியுள்ளன. இந்நிலையில் வெளியான ஒரு புதிய ஆய்வு அறிக்கை, காலநிலை மாற்றத்தின் காரணமாக ஐரோப்பாவில் எரியும் நிலப்பரப்பு 39 முதல் 192 சதவீதம் வரை கூடும் என எச்சரிக்கை விடுத்துள்ளது. இது ஆய்வாளர்களுக்கு கடும் கவலையை ஏற்படுத்தியுள்ளது.

இதே காலகட்டத்தில், பிரான்ஸில் பதிவு செய்யப்பட்ட வெப்பநிலை புள்ளிவிவரங்களும் அதிர்ச்சி தரும் வகையில் உள்ளன. இந்த கோடையில், 40 டிகிரி செல்சியஸ் அல்லது அதற்கு மேற்பட்ட வெப்பநிலை பதிவான வானிலை நிலையங்களின் எண்ணிக்கை இதுவரை இல்லாத அளவுக்கு அதிகரித்துள்ளது. இத்தகைய வெப்பநிலை பதிவான நாட்களின் மொத்த எண்ணிக்கை 2,153 ஆக உயர்ந்துள்ளது. இது 2003ஆம் ஆண்டு பதிவான முந்தைய சாதனையான 966ஐ விட மிக அதிகமாகும்.

ஜூலை மாத இறுதியில் தொடங்கிய வெப்ப அலை, பிரான்ஸ் நாட்டில் இதுவரை பதிவான வெப்ப அலைகளிலேயே நீண்ட காலம் நீடித்ததாக மாறியுள்ளது. 1983ஆம் ஆண்டு பதிவான வெப்ப அலையுடன் இது இணை சாதனை படைத்துள்ளது. அதிக அளவு வெப்பநிலை பதிவான வகையில் பார்த்தால், ஜூன் மாத இறுதியில் ஏற்பட்ட வெப்ப அலையே பிரான்ஸ் நாட்டில் இதுவரை பதிவான மிக கடுமையான வெப்ப அலையாக தொடர்கிறது.

இந்த வறட்சியின் விளைவுகள் நுகர்வோர் மீதும் நேரடியாக பாதிப்பை ஏற்படுத்தியுள்ளன. பழங்கள் மற்றும் காய்கறிகளின் விலை இந்த கோடையில் கணிசமாக அதிகரித்துள்ளது. பிரான்ஸ் புள்ளியியல் நிறுவனமான Insee தரவுகளின்படி, தக்காளி, குடைமிளகாய், கத்தரிக்காய் போன்ற காய்கறிகளின் விலை கடந்த ஆண்டுடன் ஒப்பிடும்போது சராசரியாக 13 சதவீதம் உயர்ந்துள்ளது. அதே நேரம், வறட்சியால் விளைச்சல் குறைந்ததால், சந்தையில் விற்கப்படும் காய்கறிகளின் அளவும் சிறியதாக மாறியிருப்பதாக தெரிவிக்கப்படுகிறது. இவை அனைத்தும் காலநிலை மாற்றம் ஐரோப்பாவின் இயற்கை சூழல் மற்றும் அன்றாட வாழ்க்கையில் ஏற்படுத்தும் தாக்கத்தை தெளிவாக காட்டுகின்றன.