வார் பிரதேசத்தில் காட்டுத் தீ முற்றிலும் கட்டுப்பாட்டுக்குள்: பிரெஞ்சு நிர்வாகம் அறிவிப்பு

பிரான்ஸ் நாட்டின் தெற்குப் பகுதியில் அமைந்துள்ள வார் (Var) மாகாணத்தில் கடந்த வாரம் தொடங்கிய பாரிய காட்டுத் தீ, இறுதியாக முற்றிலுமாக அணைக்கப்பட்டு கட்டுப்பாட்டுக்குள் கொண்டுவரப்பட்டுள்ளதாக பிரெஞ்சு உள்ளூர் நிர்வாகம் (préfecture) அதிகாரப்பூர்வமாக அறிவித்துள்ளது.

கடந்த செவ்வாய்க்கிழமை தொடங்கிய இந்த தீ விபத்து, பல நாட்களாக பரவி, மாவட்டத்தின் மத்திய பகுதியில் அமைந்துள்ள பல ஊர்களை பாதித்தது. தீ தீவிரமடைந்த நிலையில், பாதுகாப்பு காரணங்களுக்காக அப்பகுதிகளில் வசித்த சுமார் 5,000 பேர் அவசர அடிப்படையில் வெளியேற்றப்பட்டனர். வீடுகளை விட்டு விலகிச் சென்ற மக்கள் தற்காலிக முகாம்களிலும் உறவினர் இல்லங்களிலும் தங்க வைக்கப்பட்டனர்.

தீயை அணைக்கும் பணியில் நூற்றுக்கணக்கான தீயணைப்பு வீரர்களும் உபகரணங்களும் ஈடுபடுத்தப்பட்டனர். வானூர்தி மூலம் நீர் தெளிக்கும் நடவடிக்கைகளும் தொடர்ச்சியாக மேற்கொள்ளப்பட்டன. காலநிலை வறட்சி மற்றும் காற்றின் வேகம் காரணமாக தீ விரைவாக பரவியதாக அதிகாரிகள் தெரிவித்திருந்தனர்.

தற்போது தீ முழுமையாக கட்டுப்பாட்டுக்குள் கொண்டுவரப்பட்டதாக நிர்வாகம் உறுதிப்படுத்தியுள்ள நிலையில், வெளியேற்றப்பட்ட மக்கள் படிப்படியாக தங்கள் இல்லங்களுக்குத் திரும்ப அனுமதிக்கப்படுவார்கள் என எதிர்பார்க்கப்படுகிறது. இருப்பினும், பாதிக்கப்பட்ட பகுதிகளில் ஏற்பட்ட சொத்து சேதம் தொடர்பான முழுமையான மதிப்பீடு இன்னும் வெளியாகவில்லை.

பிரான்ஸில் கோடைக்காலங்களில் காட்டுத் தீ சம்பவங்கள் அடிக்கடி நிகழ்வது வழக்கமாக இருந்தாலும், இந்த ஆண்டு காலநிலை மாற்றத்தின் தாக்கத்தால் இத்தகைய சம்பவங்கள் அதிகரித்து வருவதாக சுற்றுச்சூழல் நிபுணர்கள் கவலை தெரிவித்து வருகின்றனர்.