மொராக்கோவிலிருந்து ஸ்பெயினின் சேவுட்டா நகருக்கு 1,500க்கும் அதிகமான புலம்பெயர்ந்தோர்

ஸ்பெயினின் வட ஆஃபிரிக்க கடலோர நகரமான சேவுட்டாவில் புலம்பெயர்வோர் வருகை கடும் அளவில் அதிகரித்துள்ளது. உள்ளூர் தொலைக்காட்சி நிறுவனங்கள் வெளியிட்ட காணொளிகளில், டஜன் கணக்கான ஆண்களும் இளம்பருவத்தினரும் அருகிலுள்ள மொராக்கோவிலிருந்து கடலில் நீச்சலடித்து சேவுட்டா கடற்கரையை வந்தடைவது காணப்படுகிறது.இப்பகுதி பிரதேச அரசு தெரிவிப்பின்படி, கடந்த பதினைந்து நாட்களில் மட்டும் 1,500க்கும் அதிகமான பேர் வந்துள்ளனர். துணையின்றி வந்துள்ள சிறார்களுக்கான தங்குமிட மையங்களின் கொள்ளளவு 1,600 சதவீதத்திற்கும் அதிகமாக நிரம்பியுள்ளதாக யூரோநியூஸ் தெரிவித்துள்ளது. புலம்பெயர்வோருக்கான தற்காலிக தங்குமிட மையமும் அதன் அதிகபட்ச கொள்ளளவை மீறிவிட்டது.இந்நிலையில், சேவுட்டா நகர தலைவர், தேசிய அளவிலான அவசரகால நிலையை பிரகடனப்படுத்துமாறு மத்ரிட் மத்திய அரசிடம் கோரிக்கை வைத்துள்ளார். எனினும் ஸ்பானிய அரசு அதற்கு இதுவரை மறுப்பு தெரிவித்துள்ளது. நகரின் தலைவர் ராணுவ உதவியையும் கோரியுள்ளார். இந்நிலைமையை கட்டுப்படுத்த சிவில் காவல்படை (Guardia Civil) பணியில் ஈடுபடுத்தப்பட்டுள்ளது எனினும், எல்லை கடந்து வருவோரை முழுமையாக தடுக்க முடியவில்லை என ஸ்பானிய அரசு ஊடகமான RTVE செய்தி வெளியிட்டுள்ளது.பிரான்ஸ்இன்ஃபோ தெரிவிப்பின்படி, இந்த குடிபெயர்வு முயற்சிகளின்போது கடலில் அறுபதுக்கும் மேற்பட்டோர் உயிரிழந்துள்ளனர். மொராக்கோவிலிருந்து ஜிப்ரால்டர் நீரிணையைக் கடந்து ஐரோப்பாவை அடைய முயலும் புலம்பெயர்வோர் எண்ணிக்கை அண்மைக் காலமாக அதிகரித்து வருவதாகவும் தெரிவிக்கப்படுகிறது. இச்சூழலில் சேவுட்டா நகர நிர்வாகம் மற்றும் ஸ்பானிய மத்திய அரசுக்கிடையே பொறுப்பு குறித்த விவாதம் தொடர்கிறது.