ஜிரோந்த் தீ பரவல்: வெளியேற்றப்பட்ட வீடுகளில் திருட்டு, சிறப்பு போலீஸ் படை வேட்டை

பிரான்ஸின் தென்மேற்குப் பகுதியில் அமைந்துள்ள ஜிரோந்த் (Gironde) மாகாணத்தில் ஒன்பது நாட்களாக கட்டுப்படுத்த முடியாமல் பரவிவரும் பெருந்தீ காரணமாக ஆயிரக்கணக்கான வீடுகள் காலி செய்யப்பட்டுள்ளன. இந்நிலையில், தீயணைப்புப் பணிகளுக்கு மத்தியில், சில நல்லெண்ணமற்ற நபர்கள் இந்த சூழலைப் பயன்படுத்தி வெளியேற்றப்பட்ட வீடுகளில் திருட்டு செய்வதாக தகவல்கள் வெளியாகியுள்ளன.

இதைத் தடுக்கும் நோக்கில், அப்பகுதியில் ஒரு சிறப்பு போலீஸ் படை நியமிக்கப்பட்டு, காலியான வீடுகள் மற்றும் தெருக்களில் கண்காணிப்பு பணியில் ஈடுபடுத்தப்பட்டுள்ளது. இந்தப் படையினர், தீ காரணமாக மக்கள் இல்லாத பகுதிகளில் சுற்றி வந்து, சந்தேகத்திற்குரிய நடவடிக்கைகளை கண்காணித்து வருகின்றனர்.

போர்தோ (Bordeaux) நகர அரசு வழக்கறிஞர் அலுவலகம், இந்த வியாழக்கிழமை (ஜூலை 30) புதிய விசாரணைகள் தொடங்கப்பட்டதாக அறிவித்துள்ளது. இந்த விசாரணைகள், வேண்டுமென்றே தீ வைத்த சம்பவங்கள் தொடர்பாக மட்டுமல்லாமல், வெளியேற்றப்பட்ட பகுதிகளில் வலுக்கட்டாயமாக வீடுகளுக்குள் நுழைந்து திருட்டு செய்த சம்பவங்கள் குறித்தும் மேற்கொள்ளப்படுகின்றன.

இந்த பெருந்தீ காரணமாக ஏற்கனவே பெரும் சொத்து மற்றும் இயற்கை சேதம் ஏற்பட்டுள்ள நிலையில், மக்களின் காலியான வீடுகளை குறிவைத்து திருடர்கள் செயல்படுவது, பாதிக்கப்பட்ட குடியிருப்பாளர்களுக்கு மேலும் கவலையை ஏற்படுத்தியுள்ளது. அதிகாரிகள், பொதுமக்கள் தங்கள் பகுதிகளுக்குத் திரும்பும் வரை பாதுகாப்பு நடவடிக்கைகளை தீவிரப்படுத்தியுள்ளதாகவும், சட்டவிரோத நடவடிக்களில் ஈடுபடுவோர் மீது கடும் நடவடிக்கை எடுக்கப்படும் என்றும் தெரிவித்துள்ளனர்.