ஸ்பெயினில் காட்டுத் தீ: சமூக ஊடகங்களில் பரவும் தவறான தகவல்கள்

தென் மேற்கு ஐரோப்பிய நாடான ஸ்பெயினில் (Spain) கடந்த சில வாரங்களாக காட்டுத் தீ விபத்துகள் பெருமளவில் பரவி, பரந்த வனப்பகுதிகளையும் விவசாய நிலங்களையும் அழித்துள்ளன. வெப்பஅலை, வறட்சி மற்றும் காற்று வேகம் ஆகியவை தீயின் தீவிரத்தை அதிகரிக்க காரணமாக அமைந்துள்ளதாக அதிகாரிகள் தெரிவித்துள்ளனர்.

இந்த நெருக்கடி நிலையில், சமூக ஊடகங்களான ஃபேஸ்புக் (Facebook), எக்ஸ் (X) போன்றவற்றில் தீ தொடர்பான பல்வேறு தவறான தகவல்களும் தூண்டப்பட்ட வதந்திகளும் விரைவாகப் பரவி வருவதாக ஐரோப்பிய செய்தி நிறுவனமான யூரோநியூஸ் (Euronews) தெரிவித்துள்ளது. இணையத்தில் பரவும் பல புகைப்படங்களும் காணொளிகளும் தற்போதைய ஸ்பெயின் தீ சம்பவங்களுடன் தொடர்பில்லாதவை என்றும், அவை பழைய நிகழ்வுகளிலிருந்து அல்லது வேறு நாடுகளிலிருந்து எடுக்கப்பட்டவை என்றும் யூரோநியூஸ் மேற்கொண்ட சரிபார்ப்பில் தெரியவந்துள்ளது.

இதேபோல், தீ ஏற்பட்டதற்கான காரணம் குறித்தும் அரசியல் நோக்கம் கொண்ட தவறான கூற்றுகள் பரப்பப்பட்டு வருகின்றன. இவற்றில் சில கூற்றுகள் அரசாங்கத்தின் காலநிலை மற்றும் காடு மேலாண்மைக் கொள்கைகளை நேரடியாகக் குற்றம் சாட்டும் வகையில் அமைந்துள்ளன என்று செய்தி நிறுவனம் சுட்டிக்காட்டியுள்ளது. இதுபோன்ற தவறான தகவல்கள் பரவுவதால், மக்களிடையே அச்சமும் குழப்பமும் அதிகரிக்கும் அபாயம் உள்ளதாக ஊடக நிபுணர்கள் எச்சரிக்கின்றனர்.

தற்போது ஸ்பெயின் அரசு தீயை கட்டுப்படுத்த பல்வேறு பகுதிகளில் தீயணைப்புப் படையினரையும் இராணுவப் பிரிவுகளையும் அனுப்பி வருகிறது. அதே நேரத்தில், உண்மைத் தகவல் சரிபார்ப்பு நிறுவனங்கள் இணையத்தில் பரவும் தகவல்களை உன்னிப்பாக கண்காணித்து, பொதுமக்களை தவறான தகவல்களால் ஏமாறாமல் இருக்குமாறு அறிவுறுத்தி வருகின்றன. இந்நிலையில், சரியான தகவல்களை மட்டுமே அதிகாரப்பூர்வ மூலங்களிலிருந்து பெறுமாறு ஐரோப்பிய ஊடகங்கள் பொதுமக்களுக்கு அறிவுறுத்தியுள்ளன.