ஃபிரான்சில் காட்டுத்தீ: வெப்பம் அதிகரிப்பால் அச்சம் தொடர்கிறது

ஃபிரான்ஸ் நாட்டின் தென்மேற்கில் அமைந்துள்ள ஜிரோந்த் (Gironde) மாகாணத்தில் பல நாட்களாகப் பரவி வரும் பெரும் காட்டுத்தீ தற்போது 'கட்டுப்பாட்டில்' உள்ளதாக உள்ளூர் அதிகாரிகள் அறிவித்துள்ளனர். இரவு நேரத்தில் அர்காஷோன் (Arcachon) கடல்வாய் பகுதியைச் சுற்றி மீண்டும் தீப்பிடிக்கும் சம்பவங்கள் ஏற்பட்டபோதிலும், அவை உடனடியாகக் கட்டுப்படுத்தப்பட்டதாகத் தெரிவிக்கப்பட்டுள்ளது.

எனினும், அடுத்த சில நாட்களில் வறண்ட காற்றும், 40 டிகிரி செல்சியஸுக்கு மேற்பட்ட கடும் வெப்பநிலையும் நிலவும் என எதிர்பார்க்கப்படுவதால், தீ மீண்டும் கடுமையாகப் பரவும் அபாயம் உள்ளதாக அதிகாரிகள் எச்சரிக்கை விடுத்துள்ளனர். இதன் காரணமாக ஜிரோந்த் மற்றும் லாந்த் (Landes) மாகாணங்கள் உள்ளிட்ட மொத்தம் 16 மாகாணங்கள் கடும் வெப்ப அபாய எச்சரிக்கையின் கீழ் (ஆரஞ்சு நிலை) வைக்கப்பட்டுள்ளன.

இதற்கிடையில், வார் (Var) மற்றும் லாந்த் மாகாணங்களில் ஏற்கெனவே பரவிய காட்டுத்தீக்கள் முழுமையாகக் கட்டுப்படுத்தப்பட்டு, தற்போது நிலைப்படுத்தப்பட்டுள்ளன. ஆனாலும், ஹோட் கோர்ஸ் (Haute-Corse) மற்றும் ஹோட்ஸ் ஆல்ப் (Hautes-Alpes) பகுதிகளில் புதிதாக காட்டுத்தீக்கள் தொடர்ந்து பரவி வருவதாகவும் தெரிவிக்கப்பட்டுள்ளது.

தீயணைப்பு படையினர் மற்றும் அவசரகால பணியாளர்கள் இரவு பகலாக உழைத்து தீயை கட்டுப்படுத்தும் முயற்சியில் ஈடுபட்டுள்ளனர். வெப்பநிலை உயர்வும் வறண்ட காலநிலையும் தொடர்ந்தால், தீயணைப்பு பணிகள் மேலும் சவாலானதாக மாறக்கூடும் என அதிகாரிகள் தெரிவித்துள்ளனர். பொதுமக்கள் எச்சரிக்கையாக இருக்குமாறும், பாதிக்கப்பட்ட பகுதிகளில் பயணத்தைத் தவிர்க்குமாறும் அறிவுறுத்தப்பட்டுள்ளனர்.