பிரான்ஸ் வார் பகுதியில் காட்டுத்தீ: 2,500 பேர் வெளியேற்றம், 1,000 ஹெக்டேர் எரிந்து சாம்பல்

பிரான்சின் தென் பகுதியில் அமைந்துள்ள வார் (Var) மாகாணத்தில் காட்டுத்தீ மீண்டும் கடுமையடைந்துள்ளது. க்ரோ பெசியோன் (Gros Bessillon) மலைப் பகுதியில் செவ்வாய்க்கிழமை கட்டுப்பாட்டுக்குள் கொண்டுவரப்பட்டதாகக் கருதப்பட்ட தீ, மத்தியானம் 1.30 மணியளவில் தெற்குப் பகுதியில் மீண்டும் பற்றி எரியத் தொடங்கியது. பலத்த மிஸ்ட்ரால் (mistral) காற்று தீயின் தீவிரத்தை மேலும் அதிகரித்துள்ளது.

இதுவரை சுமார் 1,000 ஹெக்டேர் நிலப்பரப்பு தீயில் எரிந்து சாம்பலாகியுள்ளது. பாதுகாப்புக் காரணங்களுக்காக சுமார் 2,500 பேர் தங்கள் இல்லங்களை விட்டு வெளியேற்றப்பட்டுள்ளனர். இப்பகுதியின் மாவட்ட ஆட்சியர் (préfet), இந்த தீ 'புரிந்துகொள்ள முடியாத அளவுக்கு' மோசமாக பரவிவருவதாகக் குறிப்பிட்டுள்ளார்.

இதேவேளை, பிரான்சின் மேற்குப் பகுதியில் அமைந்துள்ள ஜிரோந்த் (Gironde) மாகாணத்திலும் காட்டுத்தீ நிலைமை தொடர்கிறது. அங்கு மாவட்ட ஆட்சியராக பணியாற்றும் சோஃபி ப்ரோகாஸ் (Sophie Brocas), 'நெருக்கடி இன்னும் முடிவடையவில்லை, தீ முழுமையாக கட்டுப்பாட்டுக்குள் வரவில்லை, ஆனாலும் நிலைமையில் முன்னேற்றம் காணப்படுகிறது' எனத் தெரிவித்துள்ளார்.

ஜிரோந்தில் மொத்தம் 220,000 பேர் தங்கள் இல்லங்களை விட்டு வெளியேற்றப்பட்டிருந்த நிலையில், தற்போது சுமார் 200,000 பேர் இருபது கிராமங்களுக்கு மீண்டும் திரும்பியுள்ளனர். மீதமுள்ளவர்கள் இன்னும் பாதுகாப்பான இடங்களில் தங்கவைக்கப்பட்டுள்ளனர். தீயணைப்புப் படையினர் இரு பகுதிகளிலும் தீயை கட்டுப்படுத்த தீவிர முயற்சிகளில் ஈடுபட்டுள்ளனர்.