ஈரானுக்கு எச்சரிக்கை: ஒப்பந்தமா அல்லது முழு தலைவணக்கமா? - டிரம்ப்

மத்திய கிழக்கில் நிலவும் பதற்றமான சூழலுக்கு மத்தியில், அமெரிக்க அதிபர் டொனால்ட் டிரம்ப் தனது ட்ரூத் சோஷியல் (Truth Social) தளத்தில் ஈரான் மீது கடும் கண்டனம் தெரிவித்துள்ளார். ஈரானிய தலைவர்களை 'முழுமையான வஞ்சகர்கள்' என விமர்சித்த அவர், அந்நாடுக்கு முன்னால் இரண்டு வழிகள் மட்டுமே உள்ளன என தெரிவித்தார் - ஒன்று பேச்சுவார்த்தை மூலம் ஒரு ஒப்பந்தத்தை ஏற்றுக்கொள்வது, அல்லது முழுமையான தலைவணக்கத்தை (capitulation) சந்திப்பது.

டிரம்பின் இந்த கருத்து, ஈரான் அரசாங்கம் அமெரிக்காவுடன் 'இந்த நேரத்தில்' பேச்சுவார்த்தை நடத்த தயாராக இல்லை என அறிவித்த சில மணி நேரங்களுக்குப் பிறகு வெளிவந்துள்ளது. இரு நாடுகளுக்கும் இடையிலான பேச்சுவார்த்தைகள் தற்போது முற்றிலும் முடக்கப்பட்ட நிலையில் உள்ளன.

அமெரிக்காவும் ஈரானும் அணுசக்தி திட்டம் தொடர்பாக பல மாத காலமாக பேச்சுவார்த்தை நடத்தி வந்த நிலையில், அந்த முயற்சிகள் தற்போது எந்த முன்னேற்றமும் இல்லாமல் நிலைத்திருப்பதாக தெரிகிறது. மத்திய கிழக்கில் தொடர்ந்து நிலவும் இராஜதந்திர பதற்றம் மற்றும் இராணுவ நடவடிக்கைகளுக்கு மத்தியில், டிரம்பின் இந்த அறிக்கை பிராந்திய சூழலை மேலும் சிக்கலாக்கும் என அரசியல் நோக்கர்கள் கருதுகின்றனர்.

எவ்வாறாயினும், டிரம்பின் இந்த கருத்துக்கு ஈரான் தரப்பில் இதுவரை உத்தியோகபூர்வ பதில் வரவில்லை. இரு நாடுகளுக்கும் இடையிலான உறவு தொடர்ந்து விரிசல் நோக்கி நகர்ந்து வருவதாக இந்த சம்பவம் காட்டுகிறது.