பகுதி சூரிய கிரகணம்: பாதுகாப்பு கண்ணாடிகளுக்கு தட்டுப்பாடு

பிரான்ஸ் நாட்டில் 1999ஆம் ஆண்டுக்கு பிறகு முதன்முறையாக, மேற்கு நோக்கிய வானில் குறிப்பிடத்தக்க பகுதி சூரிய கிரகணம் தோன்ற உள்ளது. இந்த அரிய வான வேடிக்கையை பார்க்க பாதுகாப்பு கண்ணாடிகளுக்கான தேவை திடீரென அதிகரித்துள்ளதாக லெ மோண்ட் (Le Monde) ஊடகம் தெரிவித்துள்ளது. இதன் காரணமாக, பல விற்பனை நிலையங்களில் இந்த கண்ணாடிகள் தீர்ந்துவிட்டு, மக்கள் அவற்றை தேடி பல கடைகளுக்கு செல்லும் நிலை ஏற்பட்டுள்ளது.

சூரிய கிரகணத்தை நேரடியாக பார்ப்பது கண்களுக்கு கடுமையான பாதிப்பை ஏற்படுத்தக்கூடும் என்பதால், சான்றளிக்கப்பட்ட சிறப்பு கண்ணாடிகளை அணிந்தே இதை பார்க்க வேண்டும் என வல்லுநர்கள் வலியுறுத்தி வருகின்றனர். சாதாரண கண்ணாடிகள் அல்லது வெறும் கண்களால் இதை பார்ப்பது கண் பார்வைக்கு நிரந்தர சேதத்தை ஏற்படுத்தலாம் என எச்சரிக்கப்படுகிறது.

ஃப்ரான்ஸ்இன்ஃபோ (franceinfo) ஊடகத்தின் தகவல்படி, இந்த பகுதி சூரிய கிரகணம் புதன்கிழமை மாலை சுமார் 7 மணி 10 நிமிடத்திற்கு தொடங்க உள்ளது. எனினும், இந்த நேரம் பிரதேசத்திற்கு பிரதேசம் மாறுபடும் என தெரிவிக்கப்பட்டுள்ளது. நாட்டின் தென்மேற்கு பகுதியில் சந்திரனால் சூரியன் மறைக்கப்படும் அளவு 99 சதவீதம் வரை இருக்கும் என்று கணிக்கப்பட்டுள்ளது, இது அப்பகுதி மக்களுக்கு மிகவும் தெளிவான காட்சியை அளிக்கும் என எதிர்பார்க்கப்படுகிறது.

இந்த அரிய வான நிகழ்வை நேரடியாக காண பலரும் ஆர்வத்துடன் காத்திருக்கின்றனர். ஆயினும், பாதுகாப்பான முறையில் இதை அனுபவிக்க தேவையான கண்ணாடிகளை பெறுவதே தற்போது பலருக்கும் ஒரு பெரிய சவாலாக மாறியுள்ளது. விற்பனையாளர்கள் கூடுதல் கண்ணாடிகளை கொண்டு வர முயற்சி செய்தாலும், கிரகணத்திற்கு சில மணி நேரங்களே உள்ள நிலையில் தேவைக்கேற்ப அவை போதுமானதாக இல்லை என்று தெரிவிக்கப்படுகிறது.