ரஷ்யாவுக்காக நாசவேலை திட்டமிட்ட உக்ரைனியருக்கு ஜெர்மனியில் சிறை தண்டனை

ஜெர்மனியில் ஒரு நீதிமன்றம், ரஷ்யாவுக்காக நாசவேலைகளை திட்டமிட உதவியதாக குற்றம் சாட்டப்பட்ட உக்ரைனிய நாட்டைச் சேர்ந்த நபருக்கு 15 மாத சிறை தண்டனை விதித்துள்ளது. இந்த வழக்கு, ரஷ்யா ஐரோப்பிய நாடுகளில் மேற்கொள்வதாக கருதப்படும் தொடர் நாசவேலை மற்றும் உளவு நடவடிக்கைகள் தொடர்பான அச்சத்தை மீண்டும் முன்னிலைப்படுத்தியுள்ளது.

இது போன்ற வழக்குகளில் ஈடுபடுபவர்களை 'பயன்படுத்தி வீசப்படும் முகவர்கள்' (agents jetables) என அழைக்கப்படுகின்றனர். இவர்கள் பெரும்பாலும் நேரடியாக ரஷ்ய உளவு அமைப்புகளுடன் தொடர்பில்லாதவர்களாகவும், குறைந்த ஊதியத்திற்காக அல்லது சில நேரங்களில் அறியாமலேயே இணையம் வழியாக ஆட்சேர்க்கப்பட்டவர்களாகவும் இருப்பதாக தெரிவிக்கப்படுகிறது. இவர்கள் மூலம் தங்களது சொந்த உளவாளிகளை நேரடியாக ஈடுபடுத்தாமல், ரஷ்யா நாசவேலை, தீவைப்பு, உள்கட்டமைப்பு சேதம் போன்ற செயல்களை மேற்கொள்வதாக ஐரோப்பிய பாதுகாப்பு அதிகாரிகள் சந்தேகிக்கின்றனர்.

ஜெர்மன் அரசு இது தொடர்பாக அதிக அளவில் விழிப்புடன் செயல்பட்டு வருகிறது. கடந்த சில ஆண்டுகளாக, ரஷ்யா தூண்டுவதாக கருதப்படும் நாசவேலை, உளவு மற்றும் அரசியல் ரீதியிலான உள்நாட்டு அச்சுறுத்தல் வழக்குகள் ஜெர்மனியில் அதிகரித்து வருவதாக பாதுகாப்பு அதிகாரிகள் தெரிவித்துள்ளனர். இது போன்ற சம்பவங்கள் ஐரோப்பாவின் பல பகுதிகளிலும் பதிவாகியுள்ளதாக ஃபிரான்ஸ்இன்ஃபோ (franceinfo) செய்தி நிறுவனம் தெரிவித்துள்ளது.

ரஷ்யா-உக்ரைன் போர் தொடங்கியதிலிருந்து, ஐரோப்பிய நாடுகள் பலவும் தங்களது பாதுகாப்பு அமைப்புகளை மேலும் வலுப்படுத்தி, இது போன்ற சந்தேகத்திற்குரிய நடவடிக்கைகளை கண்காணிக்க கூடுதல் நடவடிக்கைகளை மேற்கொண்டு வருகின்றன. இந்த வழக்கின் விவரங்கள் தொடர்பாக ஜெர்மன் அதிகாரிகள் மேலும் விசாரணை நடத்தி வருவதாக தெரிவிக்கப்படுகிறது.