பிரான்ஸில் கடும் வெப்பம்: ஓசோன் மாசு, தீ, வறட்சி அதிகரிப்பு

கண், மூக்கு மற்றும் சுவாசப் பாதைகளுக்கு கடுமையான பாதிப்பை ஏற்படுத்தும் ஓசோன் வாயு, கடந்த சில வாரங்களாக பிரான்ஸில் பரிந்துரைக்கப்பட்ட எல்லையை மீறி பதிவாகி வருகிறது என ஃபிரான்ஸ்இன்ஃபோ (franceinfo) தெரிவித்துள்ளது. தொடர்ச்சியான வெப்ப அலைகளே இதற்கு முக்கியக் காரணமாகக் கருதப்படுகிறது.

இதற்கிடையில், லெ மொந்த் (Le Monde) பத்திரிகை தெரிவிக்கும் தகவலின்படி, வெள்ளிக்கிழமை பிரான்ஸின் பெரும்பகுதி கடும் வெப்ப அலையை எதிர்கொண்டது. வார இறுதியில் வெப்பநிலை சற்று குறையும் என எதிர்பார்க்கப்பட்டாலும், இது வறட்சியை மேலும் மோசமாக்கி, காட்டுத் தீ பரவலுக்கு உகந்த சூழலை உருவாக்கியுள்ளது. குறிப்பாக லாந்த் (Landes) மாகாணத்தில் ஏற்பட்ட பெரும் தீவிபத்தில் சுமார் 1,100 ஹெக்டேர் நிலம் எரிந்து சாம்பலாகியுள்ளது. இதன் காரணமாக 500-க்கும் மேற்பட்டோர் தங்கள் இருப்பிடங்களை விட்டு வெளியேற்றப்பட்டனர். ஆகஸ்ட் மாத தொடக்கத்தில், நிலத்தடி நீர்நிலைகளிலும் கடுமையான பாதிப்பு காணப்பட்டதாகவும், நிலவியல் ஆய்வு நிறுவனமான BRGM கண்காணிக்கும் புள்ளிகளில் 63 சதவீதம் மாதாந்திர சராசரிக்கும் கீழே இருந்ததாகவும் தெரிவிக்கப்பட்டுள்ளது.

இந்நிலையில், காட்டுத் தீ தடுப்பு மற்றும் அதைக் கட்டுப்படுத்துவது தொடர்பான புதிய சட்டமூலத்தை இறுதி செய்ய பிரெஞ்சு பாராளுமன்றத்தால் ஏழு உறுப்பினர்கள் நியமிக்கப்பட்டுள்ளனர். இவர்கள் ஒரு மாத காலத்திற்குள் இந்த வேலையை முடிக்க வேண்டும் என அரசாங்கம் அறிவித்துள்ளது. குடிமைப் பாதுகாப்பை நவீனமயமாக்கும் சட்டமூலத்தை முன்வைப்பதாக அரசாங்கம் ஏற்கெனவே உறுதியளித்துள்ளது. இது தீயணைப்பு வீரர்களின் பணி நிலைமைகளை மேம்படுத்துவதோடு, காட்டுத் தீ தடுப்பு நடவடிக்கைகளுக்கு முன்னுரிமை அளிப்பதை நோக்கமாகக் கொண்டுள்ளது.

தொடர் வெப்ப அலைகள், வறட்சி மற்றும் காட்டுத் தீ ஆகியவை பிரான்ஸில் காலநிலை மாற்றத்தின் நேரடி விளைவுகளாக பரவலாகப் பேசப்பட்டு வருகின்றன.