தங்குமிட வசதி வழங்காததால் ஸ்ட்ராஸ்பூர்க் நகருக்கு பிரெஞ்சு அரசு அபராதம்

பிரான்சு நாட்டு நீதிமன்றம் ஒன்று, வீடற்றோருக்கு அவசரகால தங்குமிட வசதி வழங்குவதில் ஏற்பட்ட "குற்றமான போதாமை" காரணமாக பிரெஞ்சு அரசை ஸ்ட்ராஸ்பூர்க் நகராட்சிக்கு 5 லட்சத்து க்கும் மேற்பட்ட யூரோ தொகையை இழப்பீடாக வழங்குமாறு தீர்ப்பளித்துள்ளது.

ஸ்ட்ராஸ்பூர்க் நகராட்சிக்குச் சொந்தமான ஒரு விளையாட்டரங்கில் (gymnase) பல வீடற்ற நபர்களுக்கு தங்குமிட வசதி ஏற்பாடு செய்யப்பட்டிருந்தது. இதற்கான செலவினத்தை நகராட்சியே ஏற்றுக்கொண்டிருந்தது. இந்நிலையில், அவசரகால தங்குமிட வசதியை வழங்குவது அரசின் பொறுப்பு என்பதையும், அந்தப் பொறுப்பை அரசு முறையாக நிறைவேற்றத் தவறியதையும் நீதிமன்றம் உறுதி செய்துள்ளது. இதன் அடிப்படையில், நகராட்சி ஏற்ற செலவினத்தை அரசே ஈடுசெய்ய வேண்டும் என தீர்ப்பு வழங்கப்பட்டுள்ளது.

இது இதுபோன்ற முதல் வழக்கு அல்ல. இதற்கு முன்னதாக, 2025ஆம் ஆண்டு மார்ச் மாதத்தில் க்ரெனோபிள் (Grenoble) நகருக்கும், நவம்பர் மாதத்தில் போர்தோ (Bordeaux) நகருக்கும் இதே காரணத்திற்காக பிரெஞ்சு அரசு இழப்பீடு வழங்குமாறு நீதிமன்றங்கள் தீர்ப்பளித்திருந்தன. அதாவது, வீடற்றோருக்கு தேவையான அவசர தங்குமிட வசதியை உரிய முறையில் ஏற்பாடு செய்யத் தவறியதால், பல நகராட்சிகள் தங்கள் சொந்த வளங்களைப் பயன்படுத்தி இந்த வெற்றிடத்தை நிரப்ப வேண்டிய கட்டாயம் ஏற்பட்டுள்ளது என்பதை இந்த தொடர் தீர்ப்புகள் எடுத்துக்காட்டுகின்றன.

பிரான்சில் குளிர்கால மற்றும் ஆண்டு முழுவதும் வீடற்றோர் எண்ணிக்கை அதிகரித்து வருவதாகவும், அரசு வழங்கும் தங்குமிட வசதிகள் தேவைக்கு ஈடாக இல்லை எனவும் நீண்ட காலமாக விமர்சனங்கள் எழுந்து வருகின்றன. இந்நிலையில், நகராட்சிகள் தங்கள் மீது விழும் கூடுதல் நிதிச்சுமையை ஈடுகட்ட நீதிமன்றங்களை நாடி வருவது தொடர்ந்து அதிகரித்து வருகிறது.