ரைன் நதி நீர்மட்டம் குறைவு: பிரான்ஸ் கிழக்கில் பெட்ரோல் தட்டுப்பாடு

பிரான்ஸ் நாட்டில் தற்போது நிலவும் கடும் வறட்சி மற்றும் வெப்ப அலையினால், நாட்டின் முக்கிய நீர்வழிப் பாதைகளில் ஒன்றான ரைன் நதியின் நீர்மட்டம் கணிசமாகக் குறைந்துள்ளது. இந்த நதி வழியாகவே எரிபொருள் ஏற்றிச் செல்லும் கப்பல்கள் ஸ்ட்ராஸ்பூர் துறைமுகத்தை நோக்கிச் செல்கின்றன. ஆனால் நீர்மட்டம் தாழ்ந்துவிட்டதால், இந்தக் கப்பல்களால் மேலே செல்ல முடியாத நிலை உருவாகியுள்ளது.இதன் நேரடி விளைவாக, பிரான்ஸின் கிழக்குப் பகுதியில் உள்ள பல பெட்ரோல் நிலையங்களில் எரிபொருள் கிடைக்காத நிலை ஏற்பட்டுள்ளது. உள்ளூர் மக்கள் மற்றும் வாகன ஓட்டிகள் இதனால் பெரும் சிரமங்களை எதிர்கொள்கின்றனர்.இதேவேளை, நாடு முழுவதும் கடுமையான வெப்ப அலை நீடித்து வருகிறது. வெள்ளிக்கிழமையன்று, சுமார் 4 கோடி 60 லட்சம் மக்கள் வசிக்கும் பகுதிகளில் வெப்பநிலை 35 டிகிரி செல்சியசுக்கு மேல் உயரும் என எதிர்பார்க்கப்படுகிறது. இந்நிலையில், பிரான்ஸ் நாட்டின் 75 மாகாணங்களுக்கு ஆரஞ்சு நிற எச்சரிக்கை (vigilance orange) பிறப்பிக்கப்பட்டுள்ளது. இது கடும் வெப்பம் மற்றும் தீ விபத்து அபாயம் தொடர்பான எச்சரிக்கையாகும்.வறட்சியின் காரணமாக பல பகுதிகளில் காட்டுத் தீ பரவும் அபாயமும் அதிகரித்துள்ளது. அதிகாரிகள் மக்களை எச்சரிக்கையாக இருக்குமாறும், தேவையற்ற பயணங்களைத் தவிர்க்குமாறும் கேட்டுக்கொண்டுள்ளனர். தட்பவெப்ப மாற்றத்தின் விளைவாக இதுபோன்ற கடுமையான வானிலை நிகழ்வுகள் அதிகரித்து வருவதாக வல்லுநர்கள் தெரிவிக்கின்றனர். இந்நிலை தொடர்ந்தால், எரிபொருள் விநியோகச் சிக்கல் மேலும் தீவிரமடையும் அபாயம் உள்ளது என்றும் கவலை தெரிவிக்கப்படுகிறது.