ஐரோப்பாவில் காட்டுத் தீ தடுக்க புதிய தொழில்நுட்பங்கள்

பிரான்ஸ் நாட்டின் ஜிரோந்த் மாகாணத்தில் பரவலான காட்டுத் தீ பாதிப்பு ஏற்பட்டுள்ள நிலையில், மிகவும் பாதிக்கப்பட்ட நகராட்சிகளில் ஒன்றான லெ போர்ஜ் (Le Porge) பகுதிக்கு பிரதமர் செபாஸ்டியன் லெகோர்னு விஜயம் செய்து, அங்கு பணியாற்றும் தீயணைப்பு வீரர்களை சந்தித்தார். இந்த சந்திப்பின் மூலம், காட்டுத் தீ பரவுவதைத் தடுக்கும் முன்னெச்சரிக்கை நடவடிக்கைகள் குறித்த கவனம் மீண்டும் முன்னிலைக்கு வந்துள்ளது..nmmn

ஐரோப்பாவின் பிற நாடுகளில், பாரம்பரிய தீயணைப்பு முறைகளுக்குக் கூடுதலாக, புதுமையான தீத் தடுப்பு வழிமுறைகள் பயன்படுத்தப்பட்டு வருகின்றன. இதில் ஒன்று, சுற்றுச்சூழலுக்கு உகந்த மேய்ச்சல் முறை எனப்படும் 'எக்கோ-பாசுராஷ்' (éco-pâturage) ஆகும். இதன்படி, ஆடு, மாடு போன்ற கால்நடைகளை காடுகள் அருகே மேய்விடுவதன் மூலம், எளிதில் தீப்பற்றக்கூடிய புற்கள் மற்றும் புதர்களை குறைக்கும் இயற்கையான வழிமுறையாக இது கருதப்படுகிறது. இதனால் தீ பரவுவதற்கான வாய்ப்புகள் குறைகின்றன.

இதைத் தவிர, வெப்ப உணரி கொண்ட ட்ரோன்கள் (drone thermique) மூலம் காடுகளில் தீ பற்றும் ஆரம்ப அறிகுறிகளை விரைவாக கண்டறியும் தொழில்நுட்பமும் சில நாடுகளில் பயன்பாட்டில் உள்ளது. இந்த ட்ரோன்கள் வெப்ப அளவை கண்காணித்து, மனிதக் கண்ணுக்குப் புலப்படாத சிறு தீப்பொறிகளையும் முன்கூட்டியே கண்டறியும் திறன் கொண்டவை.

மேலும், சிறு செயற்கைக்கோள்கள் (minisatellite) மூலமான கண்காணிப்பு முறையும் பயன்பாட்டில் உள்ளதாகக் கூறப்படுகிறது. இவை காடுகளின் வெப்ப நிலை மற்றும் வறட்சி அளவை தொடர்ந்து கண்காணித்து, தீ ஏற்படக்கூடிய பகுதிகளை முன்கூட்டியே அடையாளம் காண உதவுகின்றன.

இந்த மாற்று வழிமுறைகள், காலநிலை மாற்றத்தால் அதிகரித்து வரும் காட்டுத் தீ அபாயத்தை எதிர்கொள்ள ஐரோப்பிய நாடுகள் மேற்கொள்ளும் புதிய அணுகுமுறைகளை பிரதிபலிக்கின்றன. பிரான்சிலும் இதுபோன்ற நுட்பங்களை மேலும் விரிவுபடுத்தும் வாய்ப்பு குறித்து விவாதங்கள் நடைபெற்று வருகின்றன.