ஐரோப்பாவில் தொடர் காட்டுத்தீ: பிரான்ஸ், கிரீஸ், இங்கிலாந்தில் பேரழிவு

பிரான்ஸ், கிரீஸ், இங்கிலாந்து உள்ளிட்ட பல ஐரோப்பிய நாடுகளில் கடும் வெப்ப அலையால் காட்டுத்தீ பரவி பேரழிவை ஏற்படுத்தி வருகிறது. கிரீஸின் கிரீட் (Crete) தீவில் புதன்கிழமை தொடங்கிய தீ, வியாழக்கிழமை மற்றொரு பகுதியில் மேலும் பரவியதால், சுமார் 8,000 பேர் பாதுகாப்பான இடங்களுக்கு வெளியேற்றப்பட்டனர். இந்த தீவிபத்தில் மூன்று தீயணைப்பு வீரர்கள் உயிரிழந்துள்ளனர் என தெரிவிக்கப்பட்டுள்ளது.

பிரான்ஸில் ஜிரோந்த் (Gironde) பகுதியில் சோமோஸ் (Saumos) என்ற இடத்தில் ஏற்பட்ட தீ, 42,000 ஹெக்டேர் பைன் மரக் காடுகளை அழித்துள்ளது. இந்த தீ இன்னும் முழுமையாக கட்டுப்பாட்டுக்குள் கொண்டுவரப்படவில்லை. போர்டோ (Bordeaux) பகுதியைச் சேர்ந்த ஆய்வாளர் சில்வேன் டெல்சான் (Sylvain Delzon), இந்த காட்டை மீண்டும் பைன் மரங்களை நட்டே மறுசீரமைக்க வேண்டும் எனவும், ஆனால் எதிர்கால வறட்சி மற்றும் தீ அபாயங்களை எதிர்கொள்ளும் வகையில் மாறுபட்ட முறையில் நடவு செய்ய வேண்டும் எனவும் கருத்து தெரிவித்துள்ளார்.

அதே நேரம், கோட் தோர் (Côte-d'Or) பகுதியில் உள்ள கூச்செய் (Couchey) கிராமத்தில் ஏற்பட்ட தீ 150 ஹெக்டேர் பரப்பளவை சேதப்படுத்தியுள்ளது. இந்த தீ வேண்டுமென்றே வைக்கப்பட்டிருக்கலாம் என்ற சந்தேகம் எழுந்துள்ளதால், உள்ளூர் ஜென்டர்மரி (gendarmerie) படையினர் சாட்சிகளிடம் தகவல் கோரி அறிக்கை வெளியிட்டுள்ளனர்.

வெப்ப அலையின் தாக்கத்தால் தார்ன்-எ-கரோன் (Tarn-et-Garonne) மாகாணத்தில் உள்ள கோல்ஃபேச் (Golfech) அணுமின் நிலையம், இந்த கோடையில் மூன்றாவது முறையாக இயக்கம் நிறுத்தப்பட்டுள்ளது என்று மின் நிறுவனமான ஈடிஎஃப் (EDF) தெரிவித்துள்ளது. ஜிரோந்த் பகுதியில் நிலைமை படிப்படியாக மேம்பட்டு வருவதாகவும், அங்கு மூடப்பட்டிருந்த ஏ63 (A63) நெடுஞ்சாலை மீண்டும் இருபுறமும் திறக்கப்பட்டதாகவும் தெரிவிக்கப்பட்டுள்ளது. உள்துறை அமைச்சரும் தீயணைப்பு படையினரும் மக்களை எச்சரிக்கையுடன் இருக்குமாறு வேண்டுகோள் விடுத்துள்ளனர்.

இதற்கிடையில், தீயணைப்பு பணியில் முக்கிய பங்கு வகிக்கும் கனடேர் (Canadair) விமானங்களின் பராமரிப்பு குறித்தும் விமர்சனங்கள் எழுந்துள்ளன. இந்த விமானங்களில் பெரும்பாலானவை சுமார் முப்பது ஆண்டுகளுக்கு முன்பு தயாரிக்கப்பட்டவை என்றும், அவற்றுக்கான உதிரிபாகங்களை கண்டுபிடிப்பது கடினமாக உள்ளது என்றும், இதனால் பராமரிப்பு பொறுப்பேற்றுள்ள நிறுவனத்தின் மீது கடும் விமர்சனம் எழுந்துள்ளது.

இங்கிலாந்தின் கிழக்குப் பகுதியில் புதன்கிழமை மாலை ஏற்பட்ட தீவிபத்தில் நூற்றுக்கணக்கான ஹெக்டேர் நிலம் எரிந்துள்ளது. இதனால் சில குடியிருப்பாளர்கள் வெளியேற்றப்பட்டு, 120 தீயணைப்பு வீரர்கள் களமிறக்கப்பட்டுள்ளனர். இந்த தீயின் காரணம் இதுவரை கண்டறியப்படவில்லை.