பிரான்ஸ்: லாந்த் காட்டில் தீ, 600 ஹெக்டேர் எரிந்து சாம்பலானது

பிரான்ஸ் நாட்டின் தென்மேற்குப் பகுதியில் உள்ள லாந்த் மாகாணத்தில் அமைந்திருக்கும் பரந்த காட்டுப் பகுதியில் வியாழக்கிழமை தீ பற்றியது. தொடர்ச்சியான கடும் வெப்ப அலைகளால் இப்பகுதியின் காடுகள் நீண்ட காலமாக காய்ந்து வறண்டு போயிருந்த நிலையில், இந்த தீ விபத்து வேகமாக பரவியது.

தற்போது இந்த மாகாணத்திற்கு ஆரஞ்சு நிற எச்சரிக்கை (vigilance orange) பிரகடனப்படுத்தப்பட்டுள்ளது, இது கடும் வெப்பநிலை குறித்த அபாய அறிவிப்பாகும். தீ பரவலைத் தொடர்ந்து, பாதுகாப்பு காரணங்களுக்காக சுமார் 500 பேர் அப்பகுதியிலிருந்து வெளியேற்றப்பட்டுள்ளனர்.

தீயை அணைக்கும் பணிகள் தொடர்ந்து நடைபெற்று வருகின்றன. லாந்த் மாகாணம் பிரான்ஸ் நாட்டிலேயே மிகப் பெரிய காட்டுப் பகுதிகளில் ஒன்றைக் கொண்டுள்ளது என்பது குறிப்பிடத்தக்கது. கடந்த சில ஆண்டுகளாக, காலநிலை மாற்றத்தால் ஏற்படும் கடும் வெப்ப அலைகள் காரணமாக இந்தப் பகுதியில் காட்டுத் தீ விபத்துகள் அதிகரித்து வருவதாக அறிக்கைகள் தெரிவிக்கின்றன.

இது போன்ற தீ விபத்துகள் சுற்றுச்சூழல் மற்றும் உள்ளூர் மக்களின் பாதுகாப்புக்கு பெரும் அச்சுறுத்தலாக அமைந்துள்ளதுடன், அப்பகுதியின் வனவளத்திற்கும் கடும் சேதத்தை ஏற்படுத்தி வருகிறது. அதிகாரிகள் தீ முழுமையாக கட்டுப்பாட்டுக்குள் வரும் வரை பொதுமக்கள் விழிப்புடன் இருக்குமாறு அறிவுறுத்தியுள்ளனர்.