பிரான்ஸ் நாடுகடத்தலை எதிர்த்த ரஷ்ய பிரச்சாரக்காரர் மேல்முறையீடு தோல்வி

ரஷ்ய அரசுக்கு ஆதரவான பிரச்சார ஊடகமான RT France-ன் முன்னாள் தலைமை நிர்வாகியான செனியா ஃபியதோரோவா (Xenia Fedorova) மீதான நாடுகடத்தல் உத்தரவை எதிர்த்து அவர் தொடர்ந்த மேல்முறையீட்டு வழக்கை பாரிஸ் நிர்வாக நீதிமன்றம் தள்ளுபடி செய்துள்ளது. இதன்மூலம் அவர் மீதான கட்டுப்பாடுகள் தற்போது தொடர உள்ளன.

புதன்கிழமை முதல் ஃபியதோரோவா பாரிஸ் நகரில் வீட்டுக் காவலில் வைக்கப்பட்டுள்ளார். இதன் அடிப்படையில் அவர் தொடர்ந்து காவல் நிலையத்தில் ஆஜராகி பதிவு செய்ய வேண்டிய கட்டாயத்தில் உள்ளார். இந்த கட்டாயத்தை எதிர்த்தே அவர் நீதிமன்றத்தில் மேல்முறையீடு செய்திருந்தார்.

எனினும், நீதிமன்றம் தனது தீர்ப்பில், ஃபியதோரோவா பாரிஸ் பிரதேசத்தை விட்டு வெளியேற வேண்டிய எந்த தேவையையும் எடுத்துக்காட்டவில்லை என்று குறிப்பிட்டுள்ளது. மேலும், இதற்கான அனுமதியை பெற காவல்துறை ஆணையரிடம் (préfet de police) அவர் எந்த விண்ணப்பமும் சமர்ப்பிக்கவில்லை என்றும் நீதிமன்றம் தெரிவித்துள்ளது.

பதிவு செய்ய வேண்டிய கட்டாயம் தனக்கு சிரமத்தை ஏற்படுத்துவதாக ஃபியதோரோவா குறிப்பிட்டிருந்தாலும், அதற்கான குறிப்பிட்ட விவரங்களை எதையும் அவர் வழங்கவில்லை என நீதிமன்றம் சுட்டிக்காட்டியுள்ளது. இந்த காரணங்களை முன்வைத்தே அவரது மேல்முறையீட்டு வழக்கு தள்ளுபடி செய்யப்பட்டுள்ளது.

RT France ஊடகம் ரஷ்யாவின் பிரச்சார கருவியாக செயல்பட்டதாக பிரான்ஸ் அரசால் கருதப்பட்டு, முன்னதாக அதன் ஒளிபரப்பு நடவடிக்கைகள் மீது கட்டுப்பாடுகள் விதிக்கப்பட்டிருந்தன. இந்த நிலையில், அதன் முன்னாள் தலைமை நிர்வாகியான ஃபியதோரோவா மீதான நாடுகடத்தல் நடவடிக்கை தற்போது தொடர்கிறது.