டிப்ஸ் கட்டாயம் இல்லை: ஓலா, உபர் செயலிகளுக்கு மத்திய அரசு உத்தரவு

இந்தியாவில் பரவலாகப் பயன்படுத்தப்படும் ஓலா, உபர் உள்ளிட்ட கேப் சவாரி செயலிகளில், பயணம் முடிந்தபின் கட்டணத்துடன் கூடுதலாக ‘டிப்ஸ்’ தொகையையும் கேட்கும் நடைமுறை நீண்ட நாட்களாக நடைமுறையில் இருந்து வந்தது. இந்த டிப்ஸ் தொகையை பயணிகள் கட்டாயம் செலுத்த வேண்டும் என்ற தோற்றத்தை செயலிகள் ஏற்படுத்துவதாகவும், இது தேவையற்ற அழுத்தத்தை ஏற்படுத்துவதாகவும் பலரும் புகார் தெரிவித்து வந்தனர்.

இந்நிலையில், இந்த நடைமுறைக்கு எதிராக மத்திய நுகர்வோர் விவகார அமைச்சகம் நடவடிக்கை எடுத்துள்ளது. கட்டாயமாக டிப்ஸ் தொகையைக் கேட்கக் கூடாது என்றும், டிப்ஸ் என்பது பயணியின் விருப்பப்படி மட்டுமே வழங்கப்பட வேண்டும் என்றும் ஓலா, உபர் நிறுவனங்களுக்கு மத்திய அரசு உத்தரவிட்டுள்ளது.

இது தொடர்பாக நுகர்வோர் பாதுகாப்பு ஆணையம் சார்பில் இரு நிறுவனங்களின் பிரதிநிதிகளுடன் ஆலோசனை நடத்தப்பட்டதாகவும் தெரிவிக்கப்படுகிறது. பயணிகளை ஏமாற்றும் வகையிலோ அல்லது தவறாக வழிநடத்தும் வகையிலோ செயலிகள் இயங்கக் கூடாது என்றும், கட்டணம் தொடர்பான அனைத்து விவரங்களும் பயணத்திற்கு முன்பே தெளிவாகக் காட்டப்பட வேண்டும் என்றும் அறிவுறுத்தப்பட்டுள்ளது.

இந்த உத்தரவைத் தொடர்ந்து, கேப் சவாரி நிறுவனங்கள் தங்களது செயலிகளில் தேவையான மாற்றங்களைச் செய்ய வேண்டிய கட்டாயத்தில் உள்ளன. நுகர்வோர் உரிமைகளைப் பாதுகாக்கும் நோக்கில் இந்த நடவடிக்கை எடுக்கப்பட்டுள்ளதாக மத்திய அரசு தரப்பில் தெரிவிக்கப்படுகிறது.