ரஷியத் தாங்கிகளை தடுக்க சேற்றுநிலங்களை மீட்கும் ஃபின்லாந்து

ஃபின்லாந்து நாடு, ரஷியாவுடன் நீண்ட எல்லையைப் பகிர்ந்துகொள்கிறது. இந்நிலையில், அந்நாட்டு அரசு ஒரு புதுமையான பாதுகாப்பு உபாயத்தை முன்வைத்துள்ளது. இதற்கு 'பாதுகாப்பு நோக்கிலான இயற்கை மீட்பு' எனப் பெயரிடப்பட்டுள்ளது. வெட்டப்பட்டு உலர்த்தப்பட்ட சேற்றுநிலங்களை (தூர்ப்பான் நிலங்கள்) மீண்டும் ஈரப்பதமான நிலைக்குக் கொண்டுவருவதே இதன் மையக் கருத்தாகும்.

ஃபின்லாந்து அரசு நடத்திய ஆய்வில், நாட்டின் மொத்தம் 1,80,000 ஹெக்டேர் பரப்பளவு கொண்ட சேற்றுநிலங்களை இவ்வாறு மீட்டமைக்கக்கூடும் என அடையாளம் காணப்பட்டுள்ளது. இந்த ஈரமான, சேறுநிறைந்த நிலப்பரப்புகள், கனமான ராணுவ தாங்கிகள் (டாங்குகள்) மற்றும் இதர இராணுவ வண்டிகள் நேரடியாக முன்னேறிச் செல்வதற்குத் தடையாக அமையும் என்று கருதப்படுகிறது. இதன் மூலம், எதிரி படைகளின் நகர்வை மட்டுப்படுத்தி, குறிப்பிட்ட பாதுகாப்புப் பாதைகள் வழியாக மட்டுமே அவை நகர வேண்டிய கட்டாயத்தை ஏற்படுத்தலாம் என்பது இராணுவ வல்லுநர்களின் மதிப்பீடு.

ஈரநிலங்களை மீட்டமைக்கும் இந்தத் திட்டத்திற்கு ஃபின்லாந்து இராணுவம் ஆதரவு தெரிவித்துள்ளது. ஏனெனில், சேற்றுநிலங்கள் பாதுகாப்புத் தடையாக செயல்படுவதுடன், காலநிலை மாற்றத்தைத் தணிப்பதிலும், கார்பன் வெளியேற்றத்தைக் குறைப்பதிலும், உயிரினப் பல்வகைமையைப் பாதுகாப்பதிலும் முக்கியப் பங்கு வகிக்கும். உலர்ந்த சேற்றுநிலங்கள் கார்பன் வெளியேற்றத்திற்கு காரணமாக அமைவதால், அவற்றை ஈரப்பதமான நிலைக்குத் திருப்புவது காலநிலைப் பாதுகாப்புக்கும் உதவும் என அறியப்படுகிறது.

எனினும், சில சுற்றுச்சூழல் ஆர்வலர்கள் இந்தத் திட்டத்தில் அவசரப்படக்கூடாது என எச்சரிக்கை விடுத்துள்ளனர். இராணுவ நோக்கத்திற்காக மேற்கொள்ளப்படும் இந்த மீட்பு பணிகள், சுற்றுச்சூழலியல் ரீதியாக முழுமையாகவும் நிலைத்தும் அமையுமா என்பதில் அவர்கள் கவலை தெரிவிக்கின்றனர். பாதுகாப்பு நோக்கத்திற்காக மேற்கொள்ளப்படும் இந்தத் திட்டங்கள், அறிவியல் அடிப்படையிலான சுற்றுச்சூழல் மீட்பு நடைமுறைகளை புறக்கணிக்கக் கூடாது என்று அவர்கள் வலியுறுத்துகின்றனர்.

ரஷியா-உக்ரைன் போருக்குப் பிறகு, ரஷியாவை ஒட்டியுள்ள நேட்டோ (NATO) நாடுகள் தங்கள் பாதுகாப்பு உபாயங்களை மறுசீரமைத்து வருகின்றன. இந்நிலையில், இயற்கை வளங்களை பாதுகாப்புத் தேவைகளுடன் இணைக்கும் ஃபின்லாந்தின் இந்த முயற்சி, காலநிலை மற்றும் பாதுகாப்புக் கொள்கைகளை ஒருங்கிணைக்கும் புதிய அணுகுமுறையாக கருதப்படுகிறது.