பிரான்ஸில் காட்டுத் தீ தடுக்க ஜென்டர்ம் படையினர் அணிசேர்ப்பு

பிரான்ஸ் நாட்டின் தென்பகுதியில் அமைந்துள்ள ஓட் மாகாணத்தில், கோர்பியேர் (Corbières) மலைத்தொடர் உள்ளிட்ட பரந்த காடுகளில் கோடைக்காலத்தில் அடிக்கடி தீ விபத்துகள் ஏற்படுவது வழக்கமாக உள்ளது. இந்நிலையில், தீ பரவும் அபாயத்தைத் தடுக்கும் நோக்கில் நெமஸ் என்ற பெயரில் புதிய பாதுகாப்பு நடவடிக்கை அறிமுகப்படுத்தப்பட்டுள்ளது.

இந்த நடவடிக்கையின் கீழ், தீயணைப்பு படையினர் மட்டுமல்லாமல் ஜென்டர்ம் எனப்படும் பிரான்ஸின் இராணுவப் பாணி காவல் படையினரும் காட்டுப் பகுதிகளில் ரோந்து பணியில் ஈடுபடுத்தப்பட்டுள்ளனர். இவர்களது முதன்மை பணி, வேண்டுமென்றே தீ வைக்கப்படும் சம்பவங்களை உடனுக்குடன் கண்டறிந்து, அத்தகைய செயல்களில் ஈடுபடுவோரைக் கைது செய்வதாகும். நார்பொன் (Narbonne) நகருக்கு அருகில் உள்ள கோர்பியேர் காட்டுப் பகுதியில் இந்த புதிய முறை நடைமுறைப்படுத்தப்பட்டு வருவதாக பிரான்ஸ்இன்ஃபோ (franceinfo) ஊடகம் தெரிவித்துள்ளது.

கோடைக் காலங்களில் காற்று வெப்பநிலை அதிகரிப்பு, வறண்ட தட்பவெப்ப நிலை காரணமாக தென் பிரான்சில் காட்டுத் தீ ஆபத்து தொடர்ந்து அதிகரித்து வருகிறது. இதனால் ஏற்படும் சூழல் சேதம் மற்றும் உயிரிழப்பு அபாயத்தைக் குறைக்கும் முகமாக, தீயணைப்பு படையினருக்கு துணையாக காவல் படையினரை இணைக்கும் இந்த ஒருங்கிணைந்த அணுகுமுறை மேற்கொள்ளப்பட்டுள்ளது.

தீ வைப்பு போன்ற வேண்டுமென்றே செய்யப்படும் செயல்கள் காட்டுத் தீ ஏற்படுவதற்கு முக்கிய காரணங்களில் ஒன்றாக பிரான்ஸ் அதிகாரிகளால் அடையாளம் காணப்பட்டுள்ளது. இதனால், தீ பரவும் முன்னரே சாத்தியமான ஆபத்துகளைக் கண்டறிந்து தடுப்பதே இந்த நெமஸ் திட்டத்தின் முதன்மை நோக்கமாக அமைந்துள்ளது.