பிரான்ஸ் நாடு செல்கிறார் போப் லியோ 14: செப்டம்பரில் முக்கிய பயணத் திட்டம்

பிரான்ஸ் ஊடகமான ஃபிரான்ஸ்இன்ஃபோ வெளியிட்டுள்ள தகவலின்படி, போப் லியோ 14 வம் (Léon XIV) அவர்கள் வரும் செப்டம்பர் மாதம் பிரான்ஸ் நாட்டிற்கு அரசு முறை விஜயம் மேற்கொள்ளவுள்ளார். இது கடந்த பதினெட்டு ஆண்டுகளில் ஒரு போப்பரசர் பிரான்ஸ் நாட்டிற்கு மேற்கொள்ளும் முதலாவது உத்தியோகபூர்வ அரசு விஜயமாகும்.

இந்த பயணத்தின்போது போப் லியோ 14, பாரிஸ் நகரின் புகழ்பெற்ற நோத்தர் தாம் தேவாலயத்திற்கு (Notre-Dame de Paris) செல்ல உள்ளார். இந்த தேவாலயம் சில ஆண்டுகளுக்கு முன்பு பெரும் தீ விபத்தினால் சேதமடைந்து, மீள்கட்டமைப்பு பணிகள் நிறைவடைந்த பின்னர் மீண்டும் திறக்கப்பட்டுள்ளமை குறிப்பிடத்தக்கது.

இதைத் தவிர, பிரான்ஸின் புகழ்பெற்ற ஷாம்ப் எலிசே தெரு (Champs-Élysées), தேசிய அரங்கமான ஸ்தாத் தெ ஃபிரான்ஸ் (Stade de France) ஆகிய இடங்களுக்கும் அவர் பயணிக்க திட்டமிட்டுள்ளார். மேலும், கத்தோலிக்க திருத்தலமான லூர்த் (Lourdes) நகருக்கும், வடகிழக்கு பிரான்சில் அமைந்துள்ள மெட்ஸ் (Metz) நகருக்கும் அவரது பயணம் நீடிக்கும் என தெரிவிக்கப்பட்டுள்ளது.

இந்த வருகை பிரான்ஸ் நாட்டின் அரசு மற்றும் கத்தோலிக்க திருச்சபை உறவுகளில் முக்கியத்துவம் பெறும் நிகழ்வாக கருதப்படுகிறது. கடந்த பல ஆண்டுகளாக பிரான்ஸ் நாட்டிற்கு பல போப்பரசர்கள் தனிப்பட்ட முறையிலும், சிறப்பு நிகழ்வுகளுக்காகவும் விஜயம் மேற்கொண்டிருந்த போதிலும், அதிகாரப்பூர்வ அரசு விஜயம் நடைபெறுவது நீண்ட காலத்திற்குப் பிறகு இதுவே முதல் முறையாகும்.

பிரான்ஸ் அரசு மற்றும் வத்திக்கான் தரப்பில் இந்த பயணம் தொடர்பான விரிவான ஏற்பாடுகள் தற்போது நடைபெற்று வருகின்றன. பயணத்தின் திட்டமிட்ட நாட்கள் மற்றும் நிகழ்ச்சி நிரல் தொடர்பான கூடுதல் தகவல்கள் அதிகாரப்பூர்வமாக விரைவில் அறிவிக்கப்படும் என எதிர்பார்க்கப்படுகிறது.