லாந்த் காட்டுத் தீ: அடுத்த 15 மணி நேரம் முக்கியம் - மாகாண ஆளுநர்

பிரான்ஸ் நாட்டின் தென்மேற்கில் அமைந்துள்ள லாந்த் (Landes) மாகாணத்தில் புதிதாக மூண்ட காட்டுத் தீயை கட்டுப்படுத்தும் பணி தொடர்கிறது. வெள்ளிக்கிழமை காலை நேரத்தில் தீ ஓரளவு கட்டுப்பாட்டுக்குள் கொண்டுவரப்பட்டதாக அதிகாரிகள் தெரிவித்தனர். எனினும், மதிய நேரத்தில் வெப்பநிலை கடுமையாக உயரும் என எதிர்பார்க்கப்படுவதால், நிலைமை மீண்டும் மோசமடையக்கூடும் என அச்சம் நிலவுகிறது.

மாகாண ஆளுநர் இது தொடர்பாக பேசுகையில், தீ தற்போது 'இயல்பை முன்கூட்டியே கணிக்க முடியாத' (imprévisible) நிலையில் உள்ளதாகவும், அடுத்து வரும் 15 மணி நேரங்கள் இந்தத் தீயை கட்டுப்படுத்துவதில் முக்கியப் பங்கு வகிக்கும் எனவும் தெரிவித்தார். வெப்பநிலை உயர்வால் காற்றின் திசையும் வேகமும் மாறக்கூடும் என்பதால், தீ மேலும் பரவும் அபாயம் உள்ளதாக அவர் எச்சரித்துள்ளார்.

தீயின் காரணமாக இதுவரை 525 பேர் தங்கள் வீடுகளிலிருந்து அகற்றப்பட்டு பாதுகாப்பான இடங்களுக்கு மாற்றப்பட்டுள்ளனர். மீட்பு மற்றும் தீயணைப்புப் படையினர் பகுதிவாரியாக நிலைமையை கண்காணித்து வருகின்றனர். வானூர்தி மூலம் தண்ணீர் தெளிக்கும் பணியும் தொடர்கிறது எனத் தெரிகிறது.

லாந்த் மாகாணம் முன்னரும் கடுமையான காட்டுத் தீ சம்பவங்களை சந்தித்துள்ளது என்பது குறிப்பிடத்தக்கது. கோடைக்கால வெப்ப அலைகள் தொடர்ச்சியாக பிரான்ஸில் காட்டுத் தீ ஆபத்தை அதிகரித்து வருகின்றன. அதிகாரிகள் பொதுமக்களை எச்சரிக்கையாக இருக்குமாறும், அறிவுறுத்தல்களை பின்பற்றுமாறும் கேட்டுக்கொண்டுள்ளனர்.

தற்போதைய நிலவரப்படி, தீ முழுமையாக அணைக்கப்படவில்லை என்றும், வானிலை மாற்றத்தைப் பொறுத்தே அடுத்த சில மணி நேரங்களில் நிலைமை தீர்மானிக்கப்படும் என்றும் அதிகாரிகள் தெரிவித்துள்ளனர்.