பிரான்ஸ் Drôme பகுதியில் காட்டுத்தீ கட்டுப்பாட்டுக்குள் வரவில்லை

பிரான்ஸ் நாட்டின் தென்பகுதியில் அமைந்துள்ள Drôme மாகாணத்தில் பரவி வரும் காட்டுத்தீ, இதுவரை முழுமையாக அணைக்கப்படவில்லை என அதிகாரிகள் உறுதிப்படுத்தியுள்ளனர். Var மாகாணத்திலும் இதேபோன்ற தீ விபத்துகள் தொடர்ந்து நடைபெற்று வருகின்றன.

இந்த இரு மாகாணங்கள் உட்பட, மொத்தம் பத்து மாகாணங்களில் கடும் வெப்பஅலைக்கான ஆரஞ்சு நிலை எச்சரிக்கை தொடர்ந்து அமலில் உள்ளது. Alpes-Maritimes, Ardèche, Gard, Isère, Rhône, Vaucluse ஆகிய மாகாணங்களுடன், Corse தீவின் இரண்டு மாகாணங்களும் வியாழக்கிழமை வரையிலாவது இந்த ஆரஞ்சு எச்சரிக்கை நிலையில் இருக்கும் என அறிவிக்கப்பட்டுள்ளது.

கடும் வெப்பநிலை மற்றும் காற்று வேகம் காரணமாக தீயை முழுமையாக அணைப்பதில் மீட்புப் படையினர் சவால்களை எதிர்கொண்டு வருகின்றனர். பாதிக்கப்பட்ட பகுதிகளில் வசிப்பவர்கள் பாதுகாப்பு காரணமாக வெளியேற்றப்பட்டுள்ளதாகவும் தெரிவிக்கப்படுகிறது.

இந்நிலையில், தொடர்ச்சியாக ஏற்படும் காலநிலை பேரழிவுகளால் பாதிக்கப்படும் விவசாயிகளுக்கு உதவும் வகையில் புதிய திட்டமொன்றை பிரான்ஸ் அரசாங்கம் அறிவித்துள்ளது. காட்டுத்தீ, வறட்சி போன்ற இயற்கை பேரழிவுகளால் பயிர் நாசம், நில சேதம் உள்ளிட்ட பாதிப்புகளை எதிர்கொள்ளும் விவசாயிகளுக்கு நிதி உதவி மற்றும் பிற ஆதரவுகளை வழங்குவதே இந்த திட்டத்தின் நோக்கமாகும்.

பிரான்ஸில் கோடைகால வெப்பஅலைகள் ஒவ்வொரு ஆண்டும் தீவிரமடைந்து வருவதாக சுற்றுச்சூழல் வல்லுநர்கள் தெரிவித்து வருகின்றனர். இது காட்டுத்தீ அபாயத்தை அதிகரிப்பதோடு, விவசாயத் துறையையும் கடுமையாக பாதிக்கிறது என அரசாங்க வட்டாரங்கள் கூறியுள்ளன.