இண்டர்மார்ஷே நிறுவனத்தில் இணைய தாக்குதல்: 3 லட்சம் வாடிக்கையாளர் தகவல் கசிவு

பிரான்ஸ் நாட்டில் செயல்படும் முஸ்கத்தேர் குழுமத்திற்கு (Groupement Mousquetaires) சொந்தமான இண்டர்மார்ஷே சூப்பர்மார்க்கெட் நிறுவனம் மீது நடத்தப்பட்ட இணைய தாக்குதலில், சுமார் 3 லட்சம் வாடிக்கையாளர்களின் தனிப்பட்ட தகவல்கள் திருடப்பட்டுள்ளதாக நிறுவனம் தெரிவித்துள்ளது.

இணைய குற்றவாளிகள் வாடிக்கையாளர்களின் பெயர்கள், தொலைபேசி எண்கள், அஞ்சல் முகவரிகள், பிறந்த தேதிகள், விசுவாச அட்டை (loyalty card) எண்கள் மற்றும் ஆன்லைன் ஆர்டர் தொடர்பான சில தகவல்களை அணுக முடிந்துள்ளது என முஸ்கத்தேர் குழுமம் தெரிவித்துள்ளது.

இந்த தகவல் கசிவு நிகழ்வு அறியப்பட்டவுடன், பிரான்ஸ் நாட்டு ஊடகமான லெ மொண்ட் (Le Monde) இதனை வெளியிட்டது. இதனைத் தொடர்ந்து, பாரிஸ் அரசு வழக்கறிஞர் அலுவலகம் இந்த சம்பவம் தொடர்பாக முறையான விசாரணையைத் தொடங்கியுள்ளது.

இணையவழி தகவல் திருட்டுகள் தற்போது ஐரோப்பிய நாடுகளில் அதிகரித்து வருகின்ற நிலையில், பெரிய தொழில் நிறுவனங்களும் இதற்கு விதிவிலக்கல்ல என்பதை இந்த சம்பவம் மீண்டும் எடுத்துக்காட்டுகிறது. வாடிக்கையாளர்களின் தனிப்பட்ட தரவுகளின் பாதுகாப்பு குறித்த கேள்விகள் மீண்டும் எழும்பியுள்ளன.

தற்போது இந்த தகவல் கசிவினால் பாதிக்கப்பட்ட வாடிக்கையாளர்களுக்கு நிறுவனத்தின் தரப்பில் அறிவிப்புகள் அனுப்பப்படும் என எதிர்பார்க்கப்படுகிறது. இந்த சம்பவம் தொடர்பான விசாரணை இன்னும் ஆரம்ப கட்டத்திலேயே உள்ளது என்பதால், தாக்குதலை நடத்தியவர்கள் யார் என்பது குறித்தோ, அல்லது இதற்குப் பின்னால் உள்ள நோக்கம் குறித்தோ இதுவரை உறுதியான தகவல் வெளியாகவில்லை.

பிரான்ஸ் நாட்டில் வசிக்கும் தமிழ் சமூகத்தினர் உட்பட, இண்டர்மார்ஷே கடைகளில் அடிக்கடி பொருட்கள் வாங்கும் வாடிக்கையாளர்கள், தங்களது தகவல்கள் பாதுகாப்பாக உள்ளதா என்பதை உறுதிப்படுத்திக் கொள்ளுமாறும், சந்தேகத்திற்கிடமான அழைப்புகள் அல்லது மின்னஞ்சல்கள் வந்தால் எச்சரிக்கையாக இருக்குமாறும் அறிவுறுத்தப்படுகின்றனர்.